दरवर्षी अमळनेर पंढरपूर अशी पायी वारी जात असते, ज्येष्ठ वद्य|| 1 ते आषाढ शु|| 09 असा 24 दिवसांचा प्रवास असतो. दिंडीत सर्व जाती-धर्माचे लोक मोठ्या संख्येने भाविक जात असतात. त्यांच्या जवळील अंथरून पांघरून इतर सामान ठेवण्यासाठी मोठ्या गाडीची व्यवस्था, पिण्याच्या पाण्याच्या टँकरची व्यवस्था, वेळोवेळी गरज पडली तर जनरेटरची व्यवस्था, दिंडीत भजन-कीर्तन प्रवचनासाठी ध्वनिक्षेपची व्यवस्था, प्राथमिक आजारांवर उपचारासाठी डॉक्टरसह ऍम्ब्युलन्सची व्यवस्था करून सर्व वारकऱ्यांची काळजी घेण्याचे कार्य कसोशीने केले जाते.

संस्थान मार्फत अधून-मधून संस्कृती सेवा पुरस्कार वैशिष्ट्यपूर्ण कामगिरीसाठी प्रदान केला जातो. फिरस्ती निमित्त जेथे जेथे जातात तेथील गावात मंदिर बांधकामास मदत असो, मंदिरातील मूर्तीविषयी मागणी असो मंदिराचा कळस असो, मंदिरासाठी मोठी घंटा मागणी असो या सर्व मागण्या पूर्ण करणे बाबत महाराजांचा कधीही नकार नसतो. यातच त्यांच्या औदार्य आणि समाजाप्रती अतुट बांधिलकीचे दर्शन घडते.

2018 – 2019 द्विशताब्दी महोत्सव कार्यक्रमात वृक्ष लागवड व संवर्धन हा पर्यावरणाच्या दृष्टीने समतोल साधणारा सामाजिक उपक्रम सुद्धा राबविला गेला प्रतिकात्मक वृक्षलागवडही महाराजांचे हस्ते करण्यात आली व पावसाळ्यात अंबऋषी टेकडी व बोरीनदी पात्राचे दोन्ही काठावर वृक्षलागवडीचा संकल्प पूर्ण करण्याचे निश्चित झाले.